في رحلة تطوير نفسك، سواء كنت طالب أو خريج جديد، أكيد سمعت عن مصطلحين مهمين: Internship و Training.
بس يا ترى، إيه الفرق الحقيقي بينهم؟ وإمتى تختار كل واحد؟ والأهم: تكتب إزاي ده في السيرة الذاتية (CV)؟
في المقالة دي، هنوضح الفرق بشكل بسيط ومنظّم، وهتقدر تحدد إيه الأنسب ليك وتعرضه في الـ CV بشكل احترافي.
أولًا: يعني إيه Internship؟
ال Internship أو "التدريب العملي" هو فرصة بتقدمها الشركات أو المؤسسات للطلبة أو الخريجين الجُدد علشان يجربوا الشغل في بيئة واقعية.
بمعنى أدق:
هو فترة تدريب "عملي" قبل التوظيف، بيشتغل فيها الطالب أو المتخرج في مجال تخصصه ويطبق اللي اتعلمه بشكل واقعي.
مميزات الـ Internship:
- بتاخد فكرة واقعية عن سوق العمل.
- بتتعلم من ناس عندهم خبرة في مجالك.
- ممكن تلاقي شغل دائم بعدها لو أثبت نفسك.
- ساعات بيكون مدفوع، وساعات لا.
أمثلة على الـ Internship:
- تدريب في شركة برمجيات كمطور مبتدئ.
- تدريب في وكالة إعلانات كمساعد تسويق.
- تدريب في بنك كمحلل مالي متدرب.
مين اللي محتاج Internship؟
- الطلبة اللي عايزين خبرة عملية قبل التخرج.
- الخريجين اللي لسه بيحددوا مجال شغلهم.
ثانيًا: يعني إيه Training؟
ال Training أو التدريب المهني هو برنامج منظم لتعليمك مهارة أو معرفة جديدة، وغالبًا بيكون من خلال كورسات أو ورش عمل، سواء أونلاين أو أوفلاين.
بمعنى أدق:
هو تدريب "تعليمي" بيعلّمك مهارة جديدة من خلال محتوى نظري وعملي، وممكن يكون خطوة لتطوير نفسك أو تغيير مجالك.
مميزات الـ Training:
- بيقويك في مهارة معينة (زي Excel، AutoCAD، البرمجة...).
- بيديك شهادة بعد ما تخلص.
- ينفع تبدأ بيه لو ناوي تغيّر مجالك.
- عادة بيكون قصير (من يومين لأسبوعين).
- مش شرط يكون عندك خبرة سابقة.
أمثلة على الـ Training:
- كورسات برمجة أو تصميم جرافيك.
- ورش عمل في التسويق الرقمي.
- تدريبات على مهارات التواصل أو القيادة.
مين اللي محتاج Training؟
- أي حد عايز يطوّر نفسه أو يغير مجاله.
- لو بتستعد لوظيفة أو مقابلة شخصية.
ثالثًا: إمتى وإزاي تكتب في الـ CV إنك حضرت Internship أو Training؟
كتابة تجاربك في الـ CV بشكل صحيح بتساعدك تلفت نظر أصحاب العمل وتزود فرصك في التوظيف.
اكتب عن الـ Internship لما:
- تكون تجربة عملية فعلية في شركة أو مؤسسة.
- شاركت في مهام حقيقية واكتسبت مهارات مهنية.
- كانت المدة معقولة (شهر فأكثر).
- ناوي تشتغل في نفس المجال.
إزاي تكتبها؟
- تحت عنوان "الخبرات العملية" أو "Internship Experience".
- اكتب اسم الشركة، الوظيفة (Intern)، المدة، وأهم المهام اللي قمت بيها.
مثال:
Internship
شركة ABC – متدرب تطوير برمجيات
يونيو 2024 – أغسطس 2024
- شاركت في تطوير تطبيق ويب باستخدام JavaScript
- تعاونت مع فريق التصميم في إنشاء واجهات المستخدم
- استخدمت أدوات مثل Git واشتغلت وفقًا لمنهجية Agile
اكتب عن الـ Training لما:
- تكون تجربة تعليمية أو كورس علّمتك مهارة جديدة.
- التدريب كان نظري أو عن بُعد، ومش في شركة فعلية.
- ناوي تبرز المهارات الجديدة اللي اكتسبتها.
إزاي تكتبها؟
- تحت عنوان "الدورات التدريبية" أو "Trainings".
- اكتب اسم الدورة، الجهة المقدمة، التاريخ، والشهادة لو فيه.
مثال:
Training
دورة التسويق الرقمي – منصة XYZ
مارس 2024 (مع شهادة حضور)
- تعلمت أساسيات التسويق عبر وسائل التواصل
- استخدمت أدوات زي Google Analytics
رابعًا: نصائح مهمة عند كتابة Internship أو Training في CV
- كن واضح ومحدد: اكتب التاريخ، الجهة، والمهارات اللي اتعلمتها.
- ركز على النتائج: مش بس "حضرت تدريب"، لكن "طورت مهارة كذا"، "شاركت في كذا".
- رتبهم حسب الأهمية: التدريب العملي له أولوية عن الكورسات النظرية.
- استخدم أفعال قوية: زي "ساهمت"، "طورت"، "حللت"، "تعلمت" و بالمقابل في الانجلش.
خامسًا: الزتونة
- لو أنت طالب وعاوز تدخل الحياة العملية: ابدأ بـ Internship
- لو أنت عايز تتعلم مهارة جديدة أو تبدأ في مجال مختلف: ابدأ بـ Training
- ولو قدرت تجمع بين الاتنين؟ تبقى ضربت عصفورين بحجر!
النجاح في الشغل مش بس شهادات، النجاح الحقيقي بيبدأ من إنك تجرب، تتعلم، وتطور نفسك سواء اخترت Internship أو Training، الاهم انك تكمل و تستمر و دي كانت الحكاية باختصار
ممتاز جدا
ردحذف